أبجد هوز حطي كلمن إفتح صفحة إمسك قلمن

إكتب زي الناس ما بتنطق سقطت سايجون رفعوا العلمن

طلعت شمس اليوم ده أغاني كل ما نسمع نعشق تاني

طلعت شمس اليوم ده حريقه تكوي الجرح وتبري الألمن 

سايجون عادت للثوار فوق الدم وتحت النار

جدوا فوجدوا زرعوا فحصدوا وإحنا إيدينا للسمسار

واللي قالوه السمسارجية واللي حكاه السمساردار

لما قروه القروانجية بالمستعدل والمندار

هتش ونتش بعزم الصوت عن أمريكا وهول أمريكا 

زعموا الفانتوم شايل موت سقط الموت بعلم أمريكا

جاتكو فضيحه يا طبقه سطيحة وعاملة فصيحة وجايبة العار

وكتبنجية وفصحنجية وسمسارجية وسمساردار

سايجون درة يا ثوار عادت حره للأحرار

ده احنا حنشبع بكرا أغاني إسمع وحفظ يا كتباني

واثبت عندك فى الأوراق مصر بتنضح بالأشواق 

مصر عروسة وبكرا عريس والعشاق إحنا العشاق

فينا وبينا ولينا الثورة إحنا الثورة وهي الناس 

فينا الماضي وبينا الحاضر والمستقبل هو الناس