اعجب ما تعجب
كل شيء له سبب
ولو الكلام كان فضة
والسكوت دهب
والدموع لهب
والخشوع أدب
يحق لك
تعجب وما عليك عتب
ما عليك عتب
عجبي عليك يا زمن يابو البدع
يامبكي عيني زمن
وازاي انا اختار لروحي طريق
وأنا اللي داخل ف الحياة مرغما
عجبي
مرغم عليك يا صبر مغصوب يا ليل
لا دخلتها برجليا ولا كان لى ميل
دخلت انا ف الحياه شايليننى شيل
وبكره حاخرج منها شايلينى شيل
عجبي
نظرت فى الملكوت كتير وانشغلت
وبكل كلمة ليه وعشان ايه سألت
اسأل سؤال، الرد يرجع سؤال
واخرج وحيرتي أشد مما دخلت
عجبي
خرج ابن آدم م العدم قلت ياه
رجع ابن آدم للعدم قلت ياه
تراب بيحي وحي بيصير تراب
الأصل هوه الموت والا الحياة؟
عجبي
يا باب أيا مقفول ،امتى الدخول؟
صبرت ياما واللي يصبر ينول
دقيت سنين الرد، يرجع لي مين؟
لو كنت عارف مين انا كنت اقول
عجبي
أنا شاب لكن عمري ولا ألف عام
وحيد ولكن بين ضلوعي زحام
خايف ولكن خوفي منى انا
اخرس ولكن قلبي مليان كلام
عجبي
عجبتني كلمة من كلام الورق
النور شرق من بين حروفها وبرق
حبيت أشيلها ف قلبى قالت حرام
دا انا كل قلب دخلت فيه اتحرق
عجبي
قالوا الشقيق بيمص دم الشقيق
والناس ماهياش ناس بحق وحقيق
قلبي رميته وجبت غيره حجر
داب الحجر ورجعت قلب رقيق
عجبي
يوم قلت آه سمعوني قالوا فسد
دا كان جدع قلبه حديد واتحسد
رديت على اللايمين أنا وقلت آه
لو تعرفوا معنى زئير الأسد
عجبي
بين موت وموت بين النيران والنيران.
عالحبل ماشين الشجاعوالجبان
عجبي على دي حياة وياللعجب
إزاي أنا ياتخين بقيت بهلوان.
عجبي
ليه ياحبيبتي ما بينا دايماً سفر
ده البعد ذنب كبير لا يغتفر
ليه يا حبيبتي ما بينا دايماً بحور
أعدي بحر آلاقي غيره اتحفر
عجبي
سمعت نقطه مية جوه المحيط
بتقول لنقطه ماتنزليش فى الغويط
أخاف عليكى م الغرق ….. قلت انا
ده اللى يخاف م الوعد يبقى عبيط
عجبي
إيش تطلبي يا نفس فوق كل ده
حظك بيضحك و انتي متنكدة
ردت قالت لي النفس : قول للبشر
ما يبصوليش بعيون حزينة كده
عجبي
اعرف عيون هى الجمال و الحسن
واعرف عيون تاخد القلوب بالحضن
وعيون مخيفة وقاسية وعيون كتير
وباحس فيهم كلهم بالحزن
عجبي
انا قلبى كان شخشيخة اصبح جرس
جلجلت به صحيوا الخدم والحرس
انا المهرج . . . قمتوا ليه ؟ خفتوا ليه ؟
لاف أيدى سيف ولا تحت مني فرس
عجبي
دخل الربيع يضحك لقاني حزين
نده الربيع على اسمي . . لم قلت مين
حط الربيع ازهاره جنبي وراح
وايش تعمل الازهار للميتين
عجبي
فى يوم صحيت شاعر براحة وصفا
الهم زال . . والحزن راح واختفى
خدني العجب وسالت روحي سؤال
انا مت ؟ . . . ولا وصلت للفلسفه ؟
عجبي
إنسان . . أيا انسان ما أجهلك
ما أتفهك فى الكون وما اضالك
شمس وقمر وسدوم وملاين نجوم
وفاكرها يا موهوم مخلوقة لك ؟
عجبي
يا نجم . . نورك ليه كده بيرتجف ؟
هو انت قنديل زيت ؟ . . أو تختلف ؟
انا نجم عالي . . بس عالي قوي
وكل ما انظر تحت اخاف انحدف
عجبي
نظرت فوقى للنجوم وانا ساير
رجليَّ عترت فى الحفر والحجاير
بقيت اقول وانا ع التراب : يا سلام
مش بس عبرة اخدت . . لكن عباير
عجبي
سرداب فى مستشفى الولادة طويل
صرخات عذاب ورا كل باب وعويل
وفي الطريق متزوقين البنات
متزوقين . . . للحب والمواويل
عجبي
مع إن كل الخلق من اصل طين
وكلهم بينزلوا مغمضين
بعد الدقايق والشهور والسنين
تلاقي ناس أشرار وناس طيبين
عجبي
ياللي نصحت الناس بشرب النبيت
مع بنت حلوة ..وعود ..وضحك وحديت
مش كنت تنصحهم منين يكسبوا
تمن ده كله . . . ولا يمكن نسيت
عجبي
ياللي انت بيتك قش مفروش بريش
تقوى عليه الريح …يصبح مافيش
عجبي عليك حواليك مخالب كبار
وما لكش غير منقار وقادر تعيش
عجبي
ياملونين البيض في شم النسيم
لون الحنين والشوق وخمر النديم
ما تعرفوش سايق عليكو النبي
تلونو الأيام بلون النعيم
عجبي
عيد و العيال اتنططوا ع القبور
لعبوا استغماية .. و لعبوا بابور
و بالونات و نايلونات شفتشي
و الحزن ح يروح فين جنب السرور
عجبي
يا خالق الكون بالحساب والجبر
و خالقني ماشي بالاختيار والجبر
كل اللي حيلتي زمزمية أمل
وازاي تكفيني لباب القبر؟
عجبي
لا تجبر الإنسان ولا تحيره
يكفيه ما فيه من عقل بيحيره
اللى النهارده بيطلبه ويشتهيه
هوا اللى بكرا حيشتهي يغيره
عجبي
ياللي بتبحث عن إله تعبده.
بحث الغريق عن أي شئ ينجده
الله جميل وعليم ورحمن ورحيم.
إحمل صفاته..وانت راح توجده
عجبي
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت فى ليل الشتا
لكن حاجات أكتر بترفض تموت
عجبي
الدنيا من غير الربيع ميتة
ورقة شجر ضعفانه ومفتفتة
لأ ياجدع غلطان تأمل وشوف
زهر الشتا طالع فى عز الشتا
عجبي
أنا كنت شىء وصبحت شىء ثم شىء
شوف ربنا . . قادر على كل شىء
هز الشجر شواشيه وشوشني قال :
لابد ما يموت شىء عشان يحيا شىء
عجبي
يا مية ندامة عالقلوب الخلا
لا محبة فيها ولا كراهة ولا
حتى يا قلبي الحزن ماعدش فيك
معلش لك يوم برضو رح تتملى
عجبي
بحر الحياة مليان بغرقى الحياة
صرخت خش الموج في حلقي ملاه
قارب نجاة صرخت قالوا مافيش
غير بس هو الحب قارب نجاة
عجبي
انا قلت كلمة و كان لها معنين
كما بطن واحدة و توأمين زين و شين
لو دنيا شر، التوأم الخير يموت
و لو دنيا خير الشر هيعيش منين
عجبي
انا اللي بالامر المحال اغتوى
شفت القمر نطيت لفوق في الهوا
طلته ماطلتوش ايه انا يهمني
و ليه ما دام بالنشوى قلبي ارتوى
عجبي
اه لو انا ومحبوبي جزنا الفضا
في سفينة وحدينا و اشيا رضا
ساعة صفا تعجبنا نرجع لها
و الهم قبل ما يجي يبقى مضى
عجبي
ولدي نصحتك لما صوتي اتنبح
ما تخفش من جني و لا من شبح
و ان هب فيك عفريت قتيل إسأله
ما دافعش ليه عن نفسه يوم ما اندبح
عجبي
اوقات أفوق ويحل عني غبايا
واشعر كأني فهمت كل الخبايا
و افتح شفايفي علشان اقول الدرر
ما أقولش غير حبة غزل في الصبايا
عجبي
بلياتشو قال اية بس فايدة فنوني
و تلات وقق مساحيق بيلونوني
و الطبل و الزمامير و كتر الجعير
اذا كان جنون زبوني زاد عن جنوني
عجبي
الضحك قال يا سم عالتكشير
امشير و طوبة و انا ربيعي بشير
مطرح ما بظهر بنتصر عالعدم
انشالله اكون رسماية بالطباشير
عجبي
علم اللوع اضخم كتاب في الارض
بس اللي يغلط فيه يجيبه الارض
اما الصراحة فامرها ساهل لكن
لا تجلب مال ولا تصون عرض
عجبي
اهوى الهوى و همس الهوى في العيون
و بسمة المغرم و دمعه الحنون
وزلزلات الحب نهد الصبا
واكون انا المحبوب او لا اكون
عجبي
انا قلبي كورة و الفراودة اكم
ياما اتنطح و اتشاط و ياما اتعكم
و اقوله كله هينتهي في الميعاد
يقول بساعتك والا ساعة الحكم
عجبي
عبثا بقول و اقرا في سورة عبس
متلومش حد ان ابتسم او عبس
فيه ناس تقول الهزل يطلع جد
و ناس تقول الجد يطلع عبث
عجبي
احسن ما فيها العشق و المعشقة
وشويتين الضحك و التريقة
شفت الحياة لفيت لقيت الالذ تغيرها
و ده يعني العرق و الشقى
عجبي
عالجسر فت الصبح تحت الضباب..
بين اللي لسه بينغرس واللي طاب..
ما اهتز قلبي لنبت طالع جديد
قد اللي ماشي…وتحت باطه كتاب.
عجبي
يا حمرة يا اللي جاية تتمختر
في النيل وطرح النخل لسه اخضر
ما تمدي حبة يا دي شابة
قالت لي عمر النيل ما يتأخر
عجبي
الدنيا صندوق دنيا .. دور بعد دور
الدكة هي .. و هي كل الديكور
يمشي اللي شاف ويسيب لغيره مكان
كان عربجي أو كان امبراطور
عجبي
يومي علي الله تنتهي و تغيب
الشمس و تعود تاني يوم لهاليب
زي الحياة مأساه و من كترها
بقي لا انتهاءها و ابتداءها عجيب
عجبي
أنا كان لي أب . و كان رئيس محكمة
ستين سنة .. ف قضية واحدة أرتمى
بعد المداولة كشفت واجبه وقريت
حلوة الحياة ومضحكة ومجرمة
عجبي