ياما عطينا وما حسبنا عطانا
ويا ما اخذنا امن الزمان التجاريب

واللي بيدينا ما يطول معانا
واللي يدش الجيب يطلع من الجيب

قل للضعوف اللي تفتش ورانا
تبطون / ما تلقون فينا ولا عيب

ياللي تعذربنا وتبحث خفانا
راجع حساباتك وتلقا العذاريب

وان كان تنشد عقبها وش بلانا ؟
حنا بلانا الطيب وانموت بالطيب

الطيب خير امن الردى في هوانا
واللي هوا له شي فيما هوا يشيب

نفتل شواربنا ونكرم لحانا
ان كانها في حق والا مواجيب

ونحمي عوايدنا وستر قصرانا
ونفزع ليا منه عوا الذيب للذيب

ونلبي المحتاج لامن نصانا
ونعاونه ولا ندور مكاسيب

وما نسال المحتاج وشهو جزانا
الله يجازينا واهو عالم الغيب

ونقدر الداعي ليامن دعانا
وفي مشينا هيبه وعز وتراحيب

والشر نقصر عنْه والله كفانا
لكن لاثارت يدينا مخاضيب

ما اقول محد ٍ واصل ٍ مستوانا
كل ٍ له فعوله وله قسم بالطيب