يا أهل الهوى يا شين يوم الوداعي

يوم ٍ على العاشق كثار ٍ همومه

لا صار منت لخطت الحب واعي

تضيع في ليل ٍ تخفت نجومه

الحب ما هو بالمتاجر يباعي

مشاعر ٍ بين النفوس محكومه

ما للزعل ومعاند النفس داعي

محد ٍ على كيفه يحقق حلومه

بالهون يا راعي العيون الوساعي

لا تجرح العاشق وعقب ٍ تلومه

خذ القمر من نور خدك شعاعي

يا وردة ٍ فيها طراوه ونعومه

الحب يلدغ مثل لدغ الأفاعي

لا من هجم محد ٍ يقاوم هجومه

راعي الهوى لو راح عمره ضياعي

قيس الملوح جاه في الحب يومه