من ورا الشبابيك
بنداري دموع عينينا
وتجري دموعنا برضه
وتمسحهم إيدينا

ونقرب من حاجات
ونهرب من حاجات
ونبيّن حاجات
وجرحنا نداريه

ونلبس الوشوش
نزوّد الرتوش
عشان بقى مايشوفوش
الناس
جُوّانا إيه

ونجري كتير يادُنيا
كتير كتير كتير
وتحفظنا الشوارع
من كُتر المشاوير

ونرجع كل يوم
ويجي تاني يوم
نغيّر الوشوش
بس بنفس الهدوم

جُوّانا كمان حاجات
بتكسّر ف مرايات
وتمشِّينا ساعات
ف طريق طويل بجد

وبتلخبط عيون
وبتزغلل عيون
وبتغمِّي العيون
لطريق ف نهايته سَدّ