ماني مصدق أن قلبك خانني
ولا جت على بالي .. ولا توقعتها
يمكنّها صحوة .. من الله جاتني
وأشوفها بالفعل .. جت في وقتها

جربت نسيانك .. وربي عانني
لين استراحت .. نفسي اللي أوجعتها
ومادامك اخترت الفراق .. ودامني
لك حافظٍ عشرتك .. ولا خنتها

اقول .. عل يصيبك .. اللي صابني
وتذوق من طعناتك .. اللي ذقتها
حتى يضيمك وقتك .. اللي ضامني
وتعيش نفس الحاله .. اللي عشتها

وما اطرد ورى المقفى .. ولا من باعني
ولك كنت نعمه .. بس ماقدرتها
وأن فاتك قطار العمر .. مافاتني
حتى لو أشيائي .. الجميله خذتها

المسألة اكبر كثير .. ان كانني
على حسب .. قسوتك أنا .. حسبتها
حتى ولو شوقي .. لدربك جابني
ينبيك .. عن حزن الأماكن .. صمتها