البارحه يوم امرحوا الخلق شقيت .. جيبي ودمع العين مني يهلي

على الذي في سوق رفاع وافيت .. قلت السلام وهقوتي ما فطن لي 

دبر وانا في موقفي ما تعديت .. دبر سليم وطحت انا في محلي 

تسابقت عبرات قلبي ونيت .. ونه لو اني عدتها طار عقلي 

تراكضوا جيراننا وامتلى البيت .. قالوا علامك قلت جيبوا الكفن لي 

مادام غض العود قفى وانا اقفيت .. واللي يبي قلبي العنا ما حصلي 

وش فايدت عمري الا من تعافيت .. الموت اريح لي من افراق خلي 

يا موت وش علمك على القبر شحيت .. ما نيب الأول كم خذى الحب قبلي 

الله يصيبك لابغيناك ما جيت .. ياموت عجل خل عنك التغلي 

صارت حياتي هم واليوم مليت .. ما ابغى حياتي عقب ماراح خلي 

اول الى من جيت له يفرش البيت .. واليوم بانت رغبته يبي قتلي 

لامن نشدته بيننا ويش سويت .. يقول انت ابخص ولا تعتذر لي 

بيحدني اشتري قاز وكبريت .. واشعل بنفسي نار واقرب اجلي